Lur-jausiak eta bidegorria itxita Oñatin, baina errekak beren bidetik

Oihana Elorza Gorostiza 2021ko abe. 10a, 10:35

Olaran eta Oñati errekak beren bidetik doaz eta ez da arazo handirik sortu udaltzainek jakinarazi duten moduan. Santxolopeztegi auzo pareko bidegorri zatia da salbuespena; itxita dago, bidegorria urez beteta dagoelako. Errotatxo baserria, berriz, inkomunikatuta gelditu zen atzo iluntzean luizi bategatik.

Oraingoz ez dago aparteko gertaera larririk Oñatin, udaltzainek baieztatu duten moduan. Errekak euren bidetik doaz eta ez dute gainezka egin. Ohikoa den puntua da salbuespena: Santxolopeztegi auzo parean doan bidegorri zatia. Itxita dago gune hori, uragatik.

San Lorentzo eta Errekalde batzen dituen tunelean ere ur asko dago, putzu sakon xamarra egin da eta behetik bueltan joatea hobe auzo batetik bestera joateko.

Lurjausiak, baina, egon dira Oñatin, bat baino gehiago, gainera. Horietan larriena Garagartza auzoko Errotaxo baserrira bidean gertatutakoa. Atzo iluntzean gertatu zen eta Errotatxo baserrira bidean eta bertaraino autoz heldu ezinda gelditu ziren bizilagunak. Gaur dira lur hori kendu, jaso eta bidea zabaltzekoak; hondeamakinen laguntza beharko dute lur asko jausi baita.

Zuhaitzak ere bota ditu haizeak herriko toki ezberdinetan. Olabarrieta auzoan bota zituen atzo handienak, baina azkar kendu zituzten lurretik. Horri lotuta, udaltzainburuak gogora arazi du San Martin eta Santa Lutzia auzoetako zuhaiztietan ez ibiltzeko, zuhaitz adarrak erortzeko arriskua dagoelako.

Errepidean putzu asko daude eta kontuz gidatzeko gomendioa ere egin dute udaltzainek.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak