Publizitatearen munduan sona handia izan ohi duen iragarkia da Gabonetako Loteriarena, Aitor Arregi zine zuzendari oñatiarrak Goienari adierazi bezala, hein batean "estatuko hedabideetan, eta batez ere, telebistetan izaten duen zabalkunde mailagatik". Bada, Moriarti gisa sinatu arren, Arregik berak, Jose Mari Goenaga oriotarrarekin eta Jon Garaño ordiziarrarekin batera, zuzendu du 2021eko iragarkia. Hiruek egin duten lehen iragarkia.
Lobo Kane produktora madrildarrak elkarlanerako bidea ireki zieten hiru zuzendari euskaldunei, eta uda amaieran jaso zuten proiektua aurkezteko proposamena. "Hiru proiektu eskatu zituzten, tartean gurea, eta agentziak berak erabaki zuen hiruetako zeini esleitu behin-betiko iragarkia", adierazi du Arregik. Iraila "erdi inguruan" izan zuten hautaketaren berri, eta buru-belarri jarri ziren lanean: "Zinearekin antzekotasun handiak dituen arren, askoz azkarragoa izan da prozesu guztia". Urrian egin zituzten grabazio zein errealizazio lanak, eta gaur aurkeztu da iragarkia; "ikasketa prozesu trinko" bezala definitu du oñatiarrak azken bi hilabeteetan bizi izan duen esperientzia.
Cadena de décimos (Dezimo katea) izena jarri diote Elizondo eta inguruetan grabatutako iragarkiari, eta El sorteo que nos une (Batzen gaituen zozketa) izan da erabilitako eslogana.
Bihar, aurkezpena
Egindako lanarekin eta eraikitako harremanekin "oso pozik" agertu arren, egun esku artean beste hainbat proiektu darabilte Arregi, Goenaga eta Garañok. Zuzendariaren hitzetan, "datetan kointziditu digu iragarki hau egin ahal izateak, baina etorkizunean ez dakigu publizitatean jarraituko dugun". Bide horretan, eta "hainbat egitasmo etapa ezberdinetan izan arren", oñatiarrak Goienari aurreratu dio bihar bertan aurkeztuko dutela hurrengo proiektua.
