Hainbat istripu izan dira asteburuan Debagoieneko errepideetan, horietatik hiru Elorregi eta Zubillaga batzen dituen GI-2630 errepidean, egubakoitza eta zapatua bitartean. Lehena egubakoitzean 14:15eak aldera gertatu zen, bigarrena 15:45ean, eta, hirugarrena, goizaldeko 02:30eak aldera.
Eguneko lehen istripuan Oñatitik Elorregira zihoan auto bat irauli zenean gertatu zen, Elorregiko autobus geltoki parean hain justu ere. Ke dezente irten zen autotik, hala ere, ez zuen surik hartu. Autoa errepidetik kendu eta garbiketa lanak amaitu artean, ilara luzeak sortu ziren errepidean.
Bigarrenen istripuan ere auto bat irauli egin zen eta gidaria Debagoieneko Ospitalera eraman zutela jakinarazi zuen Ertzaintzak. Kasu horretan ere, auto ilara luzeak sortu ziren.
Azkenik, goizaldeko 02:30eak aldera gertatu zen hirugarren istripua. Hormigones S.A alboan errepidetik irten zen auto bat. Gidaria, badaezpada, Debagoieneko Ospitalera eraman zutela baieztatu du Ertzaintzak.
