Pandemiagatik birritan atzeratu dute data, baina, azkenean, oraingo domekan egingo dute Aloñako Igoera. Eta hori da berririk nabarmenena; alegia, lasterketa egin ahal izango dutela. Izan ere, 2020an moduan, 2021ean kirol hitzordu nabarmenenak bertan behera geratu dira, salbuespenak salbuespen –Oñatiko duatloia edota Aramaioko rallysprinta, esaterako– eta, zailtasun guztien aurretik eta dortsaletako asko aspaldi saldu eta gero, domekan 350 lagun batuko dira irteera puntuan –horietatik 140 debagoiendarrak dira, eta oñatiarrak 75–.
Ohiko orduan, 09:00etan, irtengo dira korrikalariak Foruen plazatik, 22 kilometroko lasterketa egiteko gertu. Lasterketa hasi aurretik, baina, otsailean hil zen Gary Baños omenduko dute. "Iñigo Guridi Kalibre moduan, Gary ere beti egon da laguntzen", adierazi zuten antolatzaileek aurkezpenean.
