Egubakoitzetako zinema emanaldiak jatorrizko bertsioan eskainiko dira aurrerantzean

Herritar bat leihatila digitalean zinemarako sarrerak erosten.

Euskarazko azpitituluei lehentasuna emanda eta bertsio originalean ematen hasiko dira filmak, bihartik aurrera, egubakoitzero. Bestetik, zine klubean orain artean bezala, denboraldi berri honetan ere, jatorrizko bertsioan eskainiko dituzte ikus-entzunezkoak.

Hemendik aurrera, aukera izango da Oñatiko zineman film komertzialak jatorrizko bertsioan ikusteko. Egubakoitzetan izango da hori, eta, hain zuzen, Kulura batzordean landu dute. Izan ere, batzordetik adierazi dute euskarari "dagokion tokia" eskaini nahi diotela aurrerantzean pelikulak eskaintzean, eta hauxe adierazi dute: "Euskarazko pelikulak proiektatzeaz aparte, euskara bera izango da azpitituluetan lehentasuna izango duen hizkuntza. Tamalez, pelikula guztiek ez dute aukera hori eskaintzen, eta horrela izan dadin eta gure zinema aretoetan aukera hori izan dezagun lanean jarraitu behar dugu".

Asteburuan, esaterako, Paul Verhoeven zuzendariaren Benedetta film frantziarra emango dute, eta bihar, egubakoitza, jatorrizko bertsioan eskainiko dute.

Zinekluba ere martxan da

Zineklubeko emanaldiak jatorrizko bertsioan eman ohi dira aspalditik, eta horrela jarraituko dute denboraldi honetan ere, eguenero-eguenero. Esaterako, 
gaur, Gaza mon amour pelikula palestinarra ikusi ahal izango da. Eta hilaren 28an, Summer of soul film estatubatuarra emango dute. 

Ikus-entzule kopurua

Hirutek enpresako Joxi Alonsok datu batzuk eman ditu: 2018an, 10.000 ikus-entzule izan ziren Oñatiko zineman; 2019an, ia 15.000; 2020an, pandemian, 8.800era jaitsi zen, baina orokorrean hala gertatu da gainontzeko herrietan ere; eta orain espero dute ikus-entzule kopuru hori igotzea. Azkenaldian Oñatin arrakasta gehien izan duen filma Aitor Arregiren Handia izan da, 1.600 ikus-entzulerekin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.