Aldundiaren asmoa da lurraldeak bere potentziala biderkatzea, etorkizuneko "erronkei aurre hartu eta erantzunak emateko". Markel Olano diputatu nagusiak adierazi du udalen eta Foru Aldundiaren arteko lankidetza-sare bat eraiki nahi dela, Gipuzkoa izan dadin "proiektu komun bat entzuten, ikasten eta kolektiboki erabakitzen jarraitu ahal izateko".
Lehen osoko bilkura
Udal Etorkizuna Eraikizen lehenengo osoko bilkura egin dute gaur, irailak 23, Foru Aldundian dagoen Gunea espazioan eta bertan izan dira hautatutako udalerrietako alkateak, besteak beste, Izaro Elorza Oñatiko alkatea. Olanok adierazi du ezagutza partekatzea eta sortzea dela helburua, eta kultura politiko berri bat eraikitzen joatea, entzutetik, hausnarketatik, ikaskuntzatik eta esperimentaziotik abiatuta.
Prozesuaren hasieran, egoeraren diagnostiko partekatu bat egingo da, ondoren diseinatu ahal izateko Etorkizuna Eraikizekin lotutako beharrak, eskaerak eta esperientziak bilduko dituen ekintza-plan bat. Udalerri horietan esperientzia pilotuak abiaraziz gauzatuko dela plan hori argitu dute eta, ekimena arrakastatsua bada, lurraldeko gainerako udalerrietara hedatzen joango dela gradualki.
