Atzeko kaleko jaiak ospatu dituzte Oñatin. Egubakoitzean hasi zituzten, eta jendea jai egarriz dagoela nabaritu da. Izan ere, oso harrera ona izan dute antolatutako ekitaldiek, eta jai batzordeak balorazio "positiboa" egin du.
Edukiera beteta
Egubakoitzean herriko bi talde izan ziren taula gainean: Mila Modu eta Larru beltzak. "Astean zehar jarri genituen sarrerak salgai eta berehala saldu ziren", azaldu dute antolatzaileek. 150 lagunendako edukiera egon da Goiena parkean. Zapatuko erromerian ere sarrera guztiak saldu ziren. Maddi, Garazi eta Olatz ibili ziren gaua girotzen.
Txorimaloak
Atzeko kaleko jaiek badute bereizgarri egiten duten ikurra: txorimaloak eta erraldoiak. Bada, pandemia hasi zenetik txorimalorik ez da ikusi jaietan. Atzo, korrika ez, baina txorimaloekin argazkiak egiteko aukera egon zen: "Harrera oso polita izan zuen".
Mus txapelketa
Gaur goizean artisauen azoka egon da. Eguraldi ona bateko eta Foruen Plazan grabatzen ari ziren MasterChef besteko, ohi baino jende gutxiago ibili da azokan, baina artisauak gustura geratu dira salmentekin.
Arratsaldean, aldiz, Mus txapelketa egin dute. 17 bikotek parte hartu dute. Irabazleak Rubio eta Untxu izan dira.
Zozketako zenbakiak
Atzeko kaleko jaietako zenbaki sarituak
1. Saria: 1.537 –Sara Arregik salduta–. Ordezko zenbakia: 1.335 –Nagore Zelaiak salduta–.
2. Saria: 2.227 –Iturritxon salduta–. Ordezko zenbakia: 760 –Txosnan salduta–.