2020ko edizioa pandemiak baldintzatutakoa izan bazen ere, 2021ean, Musika Hamabostaldiak "berezkoa duen anbizioz" ekingo diola azaldu dute sustatzaileek. Abuztuaren 1ean hasiko da eta 27an bukatu.
Oñatiko santutegian, abuztuaren 20an, izango da emanaldia. Zehazki, musika klasikoaren eta folkaren arteko fusioa entzun ahalko dute bertaratzen direnek. Celtic Beethoven izenpean, Beethovenen musikaren berrinterpretazioa egingo dute musikariek, Carlos Núñez gaiteroa gidari dutela.
Beethoveni egindako omenaldia
Beethovenek konposatutako musika zeltako obrak interpretatuko dituzte Arantzazun, irlandar, eskoziar edo galestar doinu zaharretan oinarrituta. Konpositore ezagunak gisa horretako ia 200 abesti egin zituen eta oso ezagunak ez diren arren, beste hainbat obra egiteko inspirazioa eman zioten. Horren adibide da Zazpigarren Sinfonia, zeltiar musika tradizioetatik ikasitako baliabidez osatuta dagoela.
