Aterpetxeak sei logela ditu eta edukiera muga erdira murriztuta dagoenez, COVID-19ra egokitzeko protokoloa dela eta, 28 ohe ditu erabilgarri. Beste zerbitzu batzuen artean honako hauek eskaintzen ditu: wifia, aisialdirako gunea, behar bezala ekipatutako sukaldea eta pixkanaka egokitzen joango diren beste batzuk.
Bezero nagusien artean honako hauek daudela adierazi dute: hezkuntza-programak garatu nahi dituzten eta egonaldia ere eskaini nahi duten ikastetxeak; erromesak (taldeka zein banaka); natura maite duten familiak; parkean zehar ibilbidea egin nahi duten mendiko taldeak; eta ingurune lasai eta naturalean jarduerak egin ahal izateko tokia behar duten elkarteak eta erakundeak. Susperturen koordinatzaile den Jon Basalduak zera azaldu du: "Pandemiak zailtasunak eragin dizkigun arren, hazteko eta proiektu berriak irekitzeko gure estrategiarekin aurrera jarraitu dugu".
