Egubakoitz arratsaldean, etxafuegoak jaurtita eman zioten hasiera Errekaldeko jaiei. Horren ostean, Nhill taldearen kontzertua izan zen, normaltasunez egin ahal izan zutena. Bizarroren txanda iritsitakoan, baina, sekulako euri zaparrada hasi zen. Dena den, batzordekoek prest zituzten aterpe batzuk eta segituan jarri ahal izan zituzten eta zuzenekoarekin arazo gabe jarraitu ahal izan zuten.
Zapatuko orientazio probak sekulako arrakasta izan zuela adierazi du jai batzordeko Mikel Garaik. Adin guztietako jendea gerturatu zela azaldu du eta oso pozik ibili zirela guztiak. Aiert Alberdiren eskutik eguerdian izan zen kontzertua eta arratsaldeko Maddi eta Leireren eta Mentertz 26/12 taldearen zuzenekoak ere oso ondo joan zirela azaldu dute batzordetik. Jaiei bukaera, Santurtziko Deiedra taldeak eman zien.
Julio Bikuña Txope auzokide zenak ateratako argazkien erakusketa ere izan zen ikusgai eta 80. hamarkadako auzoko jaietako hainbat argazki izan ziren ikusgai, esaterako, soka batetik zintzilik.