Bailarako arbasoak. Deba Goiena historiaurrean izeneko hitzaldia egingo du bihar, maiatzak 26, Alvaro Arrizabalaga oñatiarrak. Oñatiko Udalaren eta EHUko Historiaurreko Ikerketa Taldearen arteko hitzarmenean sartzen da hitzaldia, eta historiaurreaz eta paleontologiaz mintzatuko da. Eguaztenean izango da, 18:30ean, kultura etxean.
Urte asko daramatza Alvaro Arrizabalagak Euskal Herriko historiaurrea lantzen, eta ikerketa eta indusketa askotan parte hartu du. Azkenetakoa, Izturitzen; duela 30.000 urte inguruko mamuten, beste hainbat animaliaren eta tresnen arrastoak aurkitu dituzte. Arrizabalagak zuzendu duen taldean Asier Erostarbe oñatiarra ere ibili da. Biharko hitzaldian, bertako historiaurreari buruz jardungo du Arrizabalagak, Oñatikoaz eta bailarakoaz.
