Oraingoz hamahiru pilotari profesional izango ditu Ados Pilotak, eta oraingoz, talde horretan ez dago debagoiendarrik. Txapelketa gehiago jokatu nahi dituzte, eskertuta daude orain arte Emakume Master Cup-ek eman dien aukeragatik, baina uste dute ez dela nahikoa; lan baldintzak hobetu nahi dituzte, eta, guztiaren gainetik, ez dute inoren menpe egon nahi.
Bada, kluba aurkeztearekin eta bertan izango diren pilotarien berri ematearekin batera ekainaren 4an hasiko duten txapelketa ere aurkeztu zuten atzo Leitzan. Plazaz plaza izango du txapelketak izena, eta guztira hamahiru jardunaldi izango ditu. Hala, pilotariak Euskal Herrian barrena ibiliko dira, eta Katalunian ere –Bartzelonan– jokatuko dituzte zenbait partidu.
Oses aukeratuen artean
Aurreratu moduan, hamahiru pilotarien zerrendan ez dago debagoiendarrik, baina klubean pilotari gazteak ere trebatu nahi dituzte, eta hor badago ibarreko ordezkaririk. Guztira hiru pilotari gazte trebatuko dira xapelketa horren baitan. Eta, Uxue Oses da horietako bat; hala, Oñatikoarekin batera izango dira Laia Salsamendi eta Ane Mendiburu. Eta, azken urteotan txapelketetan gehien nabarmendu diren hamairu pilotariak dira Maite Ruiz de Larramendi, Iera Agirre, Amaia Aldaregia, Olatz Ruiz de Larramendi, Irantzu Etxebeste, Naroa Elizalde, Eneritz Arrieta, Oihana Orbegozo, Naroa Agirre, Ainhoa Ruiz de Infante, Olatz Arrizabalaga, Amaia Aldai eta Gentzane Aldai.
