Andrea Garciak eta Mikel Agirrek zuzentzen duten kadete mailako nesken taldeak, Euskadiko Txapelketa jokatu zuen joan den asteburuan, Zarautzen. Bertan lortutako emaitza onengatik, Espainiako txapelketako faserako sailkatu dira, Kukullagarekin batera. Txapelketa hori ekainaren 3an, 4an, 5ean eta 6an jokatuko da, oraindik zehazteke dagoen lekuan, izan ere, asteburuan jakin ahal izango da, ikusita zein emaitza lortzen dituzten taldeek lauko finalean, baina taldekideak "pozik" daude.
Asteburu honetan, lauko finala
Euskadiko Txapelketako lauko finalean, ahalik eta postu onenean geratzea lortu nahi dute txantxikuarrek. Gaur, egubakoitza, 17:30ean Kukullagaren aurka jokatuko dute; bihar, zapatua, Sinergia Orioren kontrako partidua izango dute 18:30ean; eta azkenik, domekan, Eibar izango dute aurkari 10:30ean. Garciak azaldu du "zaila" izango dutela, baina badituztela "aukerak".
Partiduak streaming bitartez zuzenean ikusi ahal izango dira gainera, Orio Eragin Eskubaloia Youtubeko kanaletik.
