Zergatik turismoari kritika?
Turismoari ez ezik, kapitalismoari, merkatu sistemari edo estatu sozialista moduan ezagutzen ditugun erregimenei ere egiten zaie kritika.
Ze turismo mota kritikatzen da?
Dena, ez soilik hotel garestietan egiten dena. Baita euren burua bidaiari moduan aurkezten dutenena ere. Orokorra da kritika. Ez da lan pedagogiko bat, teoria sakona du, abstraktua da; hausnarketarako material edo mezu asko ditu.
Nondik abiatu zara hau egiteko?
Asiara egindako neure opor bidaia batetik. Hango irudiak hartzen hasi nintzen, eta turismoari erreparatu nion gero. Nonbait irakurri nuen turismoa munduko industria handienetakoa zela, eta inprobisatu eta gai horren bueltan hasi nintzen lanean.
Nola osatu duzu lana?
Irudi gehienak duela bost urte egindako bidaia hartakoak dira, baina badira gehiago ere. 70 minutu irauten du, eta, Quentin Tarantino zuzendariaren film batzuk bezala, hau ere kapitulutan banatuta dago. Gidoia eta muntaia, esaterako, neuk egin ditut. Ahotsa bidaia hura nirekin egin zuen neskarena da eta animazioak anaiak egin ditu. Kapituluetan musika eta bertsoak ere badaude sartuta, eta horietan ere izan dut lagunen laguntza.
