Itzal txotxongilo tailerra datorren astean egingo da kultura etxean, eguaztenean, eguenean eta egubakoitzean. Tailerrek egunero bi zati izango dituzte: lehenengoan, sortu egingo dute, eta bigarrenean, oholtzan, oihal atzean inprobisatu eta jolastu egingo dute.
Zurrunka Teatro taldeko Eñaut Gorbeak eskainiko du tailerra, eta halaxe azaldu du hiru egun horietan egiten saiatuko direna: “Lehenengo egunean, itzal txotxongilo teknikaren oinarria ulertzen eta esperimentatzen saiatuko gara. Bigarrenean, gorputza eta elementu gehigarriak erabiliko ditugu, hau da, esaterako, maskara handi bat sortuko dugu. Eta hirugarren egunean, ikusiko dugu ea nola joan diren aurreko saioak, baina seguru aski argi beltzarekin jolastuko gara. Apar txotxongiloak egingo ditugu, eta margo fluoreszentearekin margotuta eta argi morea erabilita, itzalaren kontrakoaz esperimentatzeko”.
Gorbeak gaineratu du helburua ez dela mostra bat egitea izango, baizik eta esperimentatzea eta itzalen magiarekin disfrutatzea.
Izen-ematea
Atzo, astelehena, zabaldu zen izena emateko epea eta interesa dutenek egubakoitzera bitartean izango dute aukera liburutegian izena emateko. Gogoratu, zortzi urtetik gorako neska-mutikoei zuzenduta egongo dela tailerra.