Duela urte eta erdi inguru sortu zuten Inguma taldea Oñatiko lau gaztek: Ibon Perez (abeslaria), Alex Markuleta (baxu-jolea), Xabier Albistegi (bateria-jolea) eta Beñat Leturiaga (gitarrajolea). Osasun krisiaren eraginez, ezin izan dute kontzerturik eskaini, eta lehenbiziko aldiz bihar, zapatua, igoko dira agertokira.
Zazpi kantu propio
Emanaldirik eza aprobetxatu dute gazteek lanean jarraitzeko, eta entseguak egiten aritu dira azken hilabeteetan. Hala, denbora horretan zazpi kanta propio sortu dituztela azaldu du Beñat Leturiaga taldeko kideak: "Hain zuzen, horiek dira oholtzara eramango ditugunak, eta baita landuta ditugun bost kantaren bertsioak ere". Oi! musika estiloa dute ardatz eta euskaraz abesten dute. Abestien ezaugarriei buruz galdetuta, azaldu du historiko-politikoak direla horietako batzuk: "Hiruzpalau abestitan egin dugu Nafarroako historian atzera; erreferentzia asko egin dizkiogu". Leturiagak aitortu du "gogo handia" dutela herritarrei "taldea aurkeztu" eta eskaintzeko duten guztia "erakusteko".
Kontzertu bikoitza izango da Antixeneko gaztetxekoa; izan ere, talde oñatiarraz gain, Bergarako Barne Guda taldea ere igoko da agertokira. 17:00etan hasiko dira kontzertuak, baina aurrez, 16:30ean eskuratu ahal izango dira horietarako sarrerak, gaztetxean bertan, hiru euroren truke.