Hamaika urtez azpiko kategorian aritu zen Julen Urzelai, eta adin horretatik gorakoan Lara Santos, Irati Atxa, Sara Txintxurreta, Sara Iñurritegi eta Goretti Arregi. Orotara, zilarrezko lau domina eta brontzezko eta urrezko bana eskuratu zituzten ikasleek.
Musika eskolako irakasle Ainhoa Galdosek eta Anabel Henaok egindako lana positiboki baloratu dute: "Osasun egoera medio, azken unera arte ez genekien jaialdia ospatuko ote zen, eta ausartak izan dira parte-hartzen. Zoriondu besterik ez zaigu geratzen". Ikasleek, gainera, elkar ikusi eta entzunez ikasteko aukera izan dutela adierazi dute.
Jaialdiaren antolakuntzari ere keinua egin gura izan diote: "Gisa horretako jaialdiak oso balekoak dira kultura bultzatzeko, garai zail hauetan".