Gaur, bihar eta etzi, asteburu osoan, itxita egongo da Ongi taberna bertako jabeek horrela erabakita. "Azken egunetan gauza asko entzun ditugu, presioa handia izan da. Gu saiatzen gara gure lana ahalik eta ondoen egiten, baina denok, tabernara datorren bezeroak barne, bete behar ditugu neurriak; maskara jantzita izan behar dugu eta lauko taldeak zaindu. Hori betetzen eta betearazten ibiltzen gara, baina azken egunetako presio honek gainditu egin gaitu", dio tabernako jabeak.
Oñatiko datuei erreparatuta, egoera ez dela ona dio eta "nahiz eta ostalaritza zabalik egotearen alde egon, uste dugu egoerak okerrera egiten badu berriz gu izango garela kaltetuenak eta ez zaigu ezer gertatuko taberna egun batzuez itxita mantentzen badugu. Asteburu honetan horrela egongo da. Azken asteetan jaso ditugun presioek eraginda eta herrian dugun intzidentzia tasa zein den ikusita erabakirik onena dela uste dugu. Eta ikusiko dugu hurrengo asteburuan zabaltzen dugun edo ez, egoeraren arabera hartuko dugu erabakia".
