Atzo, martitzena, Zubikoan egindako bileran hartu zuten erabakia saskibaloiko talde nagusiko jokalariek. "Joan den egubakoitzean federazioaren proposamen berria jaso genuen: martxoaren 6tik ekainaren 13ra egingo den liga berrian jokatzea. Jokatuz gero, mailaz igotzeko aukera izango genuke, irabaziz gero; gutxienez talde bat igoko baita. Proposamenari ezetz esanda, ez genuke jokatuko, baina mailari eutsiko genioke, hurrengo denboraldian gauden kategorian lehiatuko ginateke. Atzo egin genuen bilera taldeko guztiok kiroldegian eta bozketa bidez hartu genuen erabakia. Ezezkoa atera zen. Liga berri horretan ez jokatzea erabaki dugu", azaldu du entrenatzaileak, Aitor Ugartek.
Entrenamenduekin jarraitu
Aurtengo denboraldian bost partidu jokatu ditu Mekalki-Aloña Mendi saskibaloi taldeak: bi urrian eta beste hirurak urtarriletik hona. Oñati eremu gorrian sartuta, entrenamenduak etetea erabaki zuten, saileko gainerako taldeek egin zuten moduan. Harrez gero geldi daude jokalariak, entrenatu barik. "Martxoaren 6a bertan dago, egun dezente daramatzagu entrenatu barik, eta lesioak izateko aukerak gehitu egin daitezke. Eta datorren denboraldirako txukun egotea gurako genuke, orain hartutako minetatik errekuperatzen ibili barik. Eta ez lehiatzea erabaki dugu. Jokatzeko gogoa badugu, ordea, eta eremu gorritik irtetean entrenamenduekin hasteko asmoa dugu. Ez dugu geldi egon gura", dio Ugartek.
Mekalki-Aloña Mendiko kategorian 14 talde daude eta gaur-bihar artean jakin arazi behar diote federazioari zein den euren erantzuna.