La Excavadora musika talde sortu berriak kontzertu bikoitza eskainiko du bihar, zapatua, Oñatiko gaztelekuan, 17:00etan eta 19:00etan hasita.
Bigarren emanaldirako sarrerak zortzi eurotan daude eskuragarri Txokolateixan, plazan dagoen Totem-ean eta Oñati.eus udal webgunean –lehen kontzerturako sarrerak agortuta daude–.
Eskarmentu handiko kideak
Raul Lasa Txiki (Gatillazo, La Polla) eta Angel Otxoa de Eribe (Gatillazo, Rockaina, Salvate Si Puedes) gitarra-joleek; Mikel Azpiroz Buton (Gatillazo, Al Karajo) baxu-joleak, Mikel Berrozpe Pollo bateria-joleak (Childrain, Vicepresidentes) eta Iñaki Urbizu Pela (Obligaciones, Sumision City Blues, Marky Ramone...) abeslariak osatzen dute La Excavadora.
Guztiek lehenagotik ezagutzen zutela elkar aitortu du Azpirozek, eta proiektu honetan egin dute bat: "Gatillazo taldearen etena aprobetxatu dugu proiektu honi ekiteko. Txiki-k esan zigun punketik atera gura zuela, eta ideia batzuk zituela. Maketak entzun genituen eta gustatu egin zitzaizkigun. Hala, aurrera egitea erabaki genuen".
Hamabi kantuko lana
Urtarrilaren 29an argitaratu zuten taldearen izen bera daraman lehen lana, Mauka Musikagintzaren eskutik. "Ideia zen hard-rock edo rock musika egitea, punketik atera guran", adierazi du Azpirozek. Hala eta guztiz ere, uste du ez dela berdina proiektua nola hasi eta amaitzen den, "emaitza sarri ez delako hasierako bera".
Diskoaren nortasunari buruz galdetuta, "galtzaileentzako rock kaletarra" abesti gehienetan nabaritu daitekeela azaldu du baxu-joleak, eta gaua, kalea eta neska-mutikoak izan dituzte horietan oinarri, besteak beste.
Ezagutzera eman guran
La Excavadora taldeak eskaintzen duen bigarren kontzertua izango da biharkoa; izan ere, aurrez Gasteizen soilik igo dira oholtzara: "Estreinakoz etxean aritu ginen, lagunez eta ezagunez inguratuta". Hori horrela, jende ez hain ezagunaren aurrean joko duten lehen aldia izango da honako hau, eta, Buton-en hitzetan, talde moduan "ezagutzera emateko aukera" izango dute. "Ikusi gura dugu jendeak nola hartzen gaituen Oñatin, eta egiten duguna gustuko izatea espero dugu; zalantza hori argitu guran goaz", aitortu du.
Diskoa osatzen duten hamabi kantuez gain, lau bertsio ere joko dituztela iragarri du.
