Zer da Elekaren ipuin sorta?
Eleka konpainiak azken hamabost urteetan gauzatu duen ikuskizun mota da. Bertso saioak dauden bezala, ipuin saioak egiten ditugu guk. Sei-zazpi bat ipuin kontatzen ditugu saio bakoitzean.
Zer-nolako ipuinak dira?
Guk hautatzen ditugu, eta badira mundu guztikoak; Afrikakoak, Asiakoak zein Ekialdekoak, adibidez. Eta baditugu Euskal Herrikoak ere, mitologiatik heldu direnak eta bestelakoak. Ipuinak dituzten liburu asko irakurtzen ditugu, gustukoenak geureganatu, geure modura idatzi, eta guk kontatu gero. Kattalin Salaberrik (65 urte) egiten du lan hori, biok (33 ute) osatzen dugu Eleka konpainia.
Elkarrekin kontatzen dituzue ipuinak?
Bai; azken hamasei urteetan elkarrekin egiten ditugu saioak. Bitxia da gure arteko harremana. Kattalin nire irakaslea izan zen umetan. Kolegioan, DBHn, antzerki eskolak eman zizkidan. Lizeoan, batxilergoan, Euskal Kulturaren Erakundeak beka bat eman zidan istorioak kontatzen ikasteko tailer baterako; Koldo Ameztoirekin egin nuen. Hori amaitzean, ikuskizun bat egin nuen Biarritzen. Daniel Landart-ek ikusi, eta Kattalinekin ondo moldatuko nintzela pentsatu zuen, eta baietz esan nion proposamenari.
Nolakoa izan zen hasiera?
Hasieran, Landartek moldatu zizkigun istorio batzuk, eta Kattalin hasi zen gero lan hori egiten; duela hamasei urte. Ikuskizun handi bat egin genuen duela hamar urte Txomin Heguy taula zuzendariarekin, Hau dela hori dela, eta duela bi urte, disko bikoitz bat atera genuen gure ipuinekin, Hala izan ala ez izan. Hamasei ipuin musikatu dira; lagun batzuk eta neu gara musika egin dugunak.
Baduzue beste proiekturik orain esku artean?
Datorren urtean beste ikuskizun antzeztuago bat taularatu nahiko genuke, Maika Etxekopar zuzendariarekin. Baina oraindik ez dugu izenik hautatu.
Oñatin badute arrakasta ipuin kontaketek. Berdina gertatzen da zuen inguruan?
Ez, ez zait iruditzen Iparraldean ohitura hori dagoenik. Baina pozten naiz hori jakiteaz. Iparraldean kontalari bakar batzuk badira, baina ez dugu lotura handirik gure artean eta publikoaren aldetik ez dago ohiturarik, nahiz eta hurbiltzen diren saioetara. Galdu egin da ohitura hori.
Ipuin kontaketetan helduek ere gozatzen dutela dio zuen esperientziak, ezta?
Hala da, bai. Saio horiek umeendako direla pentsatzen dugu beti, baina guk garbi ikusi dugu umeekin batera datozen helduek ere asko gozatzen dutela.
Zer-nolako saioak egingo dituzue Oñatin?
Ordu erdiko bi saio egingo ditugu; bakoitzean hiruzpalau ipuin kontatuko ditugu. Gogotsu goaz Oñatira, pozik; normalean, Iparraldean izaten ditugu saioak, eta plazer handia da Hegoaldean aritzea. Espero dut gure ipuinekin gozatuko eta amets egingo dutela, eta gure euskararekin bidaiatu ere egingo dutela.
Noren ipuinak entzuten dituzue zuek?
Azken bizpahiru urteetan bereziki lantzen gabiltza ipuin kontaketen artea eta hasi gara frantses ipuin kontalarien saioetara joaten, inspiratzeko eta molde ezberdinak ikusteko. Iparraldeko bertako kontalariengana ere joaten gara; adinekoak dira gehienak. Eta gure gogoa da ere Hegoaldekoekin harremanetan egotea, ikasten jarraitzeko.