Oñatiko udaltzainek kontrolak jarriko dituzte, domekara bitartean, herriko hiru puntutan, itxiera perimetrala betetzeko. Azkoagainen, Zubillagan –Osiñurdineko biribilgunean– eta Arrikrutzen jarriko dituzte, azken toki horretan baita aste barruan ere. "Ertzaintzarekin batera adostutako kontrolak dira eta hiru puntu horietan jarriko ditugu, behin baino gehiagotan batzuetan, eta ordu ezberdinetan", adierazi du udaltzainburuak. Legazpi aldean jarriko dituzten kontrolen ardura Ertzaintzarena izango da.
Aurreko asteburuan ere jarri zituzten kontrolak herrian udaltzainek, eta mugak hautsi zituzten dozena erdi bat gidari atzeman zituzten. Tartean, esaterako, Arantzazura autoa bedeinkatzera Zumaiatik zihoana eta mendira joateko asmotan beste herri batzuetatik etorritakoak. Itxiera perimetrala urratu duten kasu horiek Barne Sailera bideratuko dituzte, udaltzainek ez baitute eskumenik isunak jartzeko, ertzainek baizik.