COVID-19 gaitzari aurre egiteko hartu beharreko prebentzio neurriak direla eta, egokitzapenak egin zituzten ikasturte hasieran herriko hiru ikastetxeetako espazio publikoetan, eskolako sarrera-irteeretan jendea ez dadin pilatu. Udalak eta ikastetxeek elkarlanean hartutako neurriak izan ziren. Orain arteko emaitzak ikusi eta baloratuta, otsailetik aurrera, ikasturtea bukatu bitartean, behin betiko egokitzapenak egingo dituzte.
Aste honetatik bertatik, Urgain-Errekalden, 08:00etatik 17:00etara, eskola orduetan, egongo da debekatuta eraikin aurreko aparkalekuan aparkatzea. Txantxiku Ikastola aurreko aparkalekuak oinezkoendako eremu izaten jarraituko du aurrerantzean ere. Elkar Hezin, bestalde, itxitura berezi batzuk jarriko dituzte eta errepidea eskolako sarrera-irteeran bakarrik egongo da itxita. Elkar Heziko neurri hau, baina, datozen egunetan jarriko dute martxan, aste honetan oraindik itxita egongo da zirkulaziorako Arantzazuko ama kaleko errepide zatia, ikastetxe parekoa.
