Oñatiko EH Bilduk hitzaldi ziklo bat antolatu du egun munduan ematen ari diren joera nagusien inguruan "patxadaz solasean egiteko, herritarrekin, eragileekin eta adituekin batera". Hamar solasaldiz osatuko da 'Hamar gai / hamaika berba' zikloa eta saio bakoitzean gai baten inguruan arituko dira. Gaian adituak diren bizpahiru lagunek hartuko dute parte eta jorratuko dituzten gaien artean daude: infoxikazioa, fluxu migratorioa, genero arrakala, larrialdi klimatikoa, megahiriak eta automatizazioa.
Urtarrilean, infoxikazioari buruz
Asmoa da hilean hitzaldi bat egitea eta lehenengoa, urtarrilekoa, bihar, hilak 13, da. Infoxikazioa da gaia eta horri buruz berba egitera datoz: Ekai Txapartegi, EHUko filosofia irakaslea -informazioaren gizartea deitzen dugun honetan ezagutzaren bueltan sortu den auziari buruz jardungo du-; Iraia Oiartzabal, Garako kazetaria -hedabideetan ematen den desinformazioaz arituko da-; eta Ugo Mayor ikerlaria -infoxikazioaren gaia COVID 19-aren krisiarekin lotuko du-.
Otsaileko solasaldia fluxu migratorioen eta euskal erronkei buruzkoa izango da eta martxokoa, hirirako eskubideaz eta pertsonengan oinarritutako hirigintzari buruzkoa.
Infoxikazioari buruzko hitzaldia bihar da, eguaztena, Santa Ana aretoan, 18:30ean. Doan da, baina aurrez hartu behar da tokia udal webgunean sartuta.