Aloña Mendirekin triatloian federatzeko epea zabaldu dute dagoeneko, eta, info@aloinatriatloi.org helbidera mezua idatzita, 677 24 31 98 telefonora deituta edota euren Facebook orriaren bitartez egin daiteke izen-ematea.
Taldeko kide Iban Perezek azaldu du COVID-19aren ondorioz egoera "aldakorra" den arren aurrera egitea erabaki dutela: "Ikusi da klub antolatzaileak triatloiak lanean hasteko gogotsu daudela, eta horrek egutegia osatzea ahalbidetu du". Hala eta guztiz ere, azaldu du egutegia ez dela "behin betikoa", eta aldaketak egon daitezkeela egoeraren eboluzioaren arabera.
Oñatiko proba, apirilean
Apirilaren 24an egingo dute Oñatiko duatloia, eta berrikuntzekin datorrela azaldu du Perezek; izan ere, aurten, esprint distantzian eta erlojupeko formatuan egingo dute: "Erlojupean egitearen arrazoia izan da parte-hartzaileen arteko segurtasun distantziak mantentzearena". "Aurreikusten" dutenez, partehartzaileek bost kilometro egingo dituzte korrika, lehenik; jarraian, hogei kilometro bizikletan; eta, amaitzeko, bi kilometro eta erdi korrika. Edozelan ere, ibilbide zehatza zein izango den zehazteke dago oraindik ere, taldetik azaldu dutenez.