"Pozik" hartu du Santi Mendiola argazkilari oñatiarrak saria. Diario Vascok hurrengo urteko egutegirako antolatu duen lehiaketako lehen saria irabazi du eta egiten duenarekin "aurrera jarraitzeko gogoa" ekarri dio Mendiolari.
Bospasei argazki bidali ditu eta Zumaian "duela lau edo bost urte" ateratakoa aukeratu du epaimahaiak. "Badut ohitura harantz joateko tarteka, batez ere itsasoa haserre dagoenean. Gustatzen zait itsasoa haserre erretratatzea", azaldu du Mendiolak. Sari honekin, DVren datorren urteko egutegian birritan agertuko da argazki hau: azalean eta hilabete batean. Aurtengoak ere jaso du Mendiolak Usakon ateratako argazki bat.
Gipuzkoako Aldundiaren egutegirako ere bidali zituen Mendiolak argazki batzuk. "Gipuzkoa eta turismoa" zen gaia eta Arantzazun ateratako argazki bat saritu dute. Ez da egutegian agertuko baina aipamen berezia jaso du argazki horrek.
Mendiola GOIENAko kolaboratzailea ere bada. GOIENAk egubakoitzero argitaratzen duen Puntua aldizkariak ere argitaratu izan ditu Santi Mendiola oñatiarraren argazkiak.
