Zinema Akademiako Film Laburren Batzordeak hartu du hasierako erabakia, baina datozen asteetan akademiko guztiek bozkatu beharko dituzte martxoaren 6an ospatuko diren Goya sarietarako behin betiko hautagaiak.
Aitor Arregi eta Jose Mari Goenaga (Moriarti) euskal zuzendarien lanean alzheimerra da gai nagusia. Denboraldi batez ama ikusi gabe egon ondoren, Angel Marik bisitan joatea erabakiko du, baina ez zaio gustatzen ama egoera horretan ikustea; ez baita inor ezagutzeko gai. Bisita horretan beste adineko emakume bat gerturatuko zaio Angel Mariri eta ezagutzen ez duen arren, emakumeak bere bizitzaren inguruko datu asko kontatuko dizkio. Baina antza, zaintzaileen esanetan, horrenbeste dakien emakumeak ere zahartzaroko dementzia du.
Sari ugari dagoeneko
La Trinchera Infinita, Handia eta Loreak lanen zuzendariek hainbat sari jaso dituzte dagoeneko Mateoren Ama filmarekin: ZINEBI- Euskal film labur onenaren Sari Nagusia, Madrilgo Zinemaldiko Alma saria gidoi onenari, Short form Serbian lehen saria eta L 'Alfàs del Pieren Zinemaldiako saria, besteak beste.
