Oñatiko San Migel parrokiako abesbatzak ez du abestuko datozen astetan, koronabirusagatik. Baina ez da COVID 19 gaitzak parrokiara ekarri duen aldaketa bakarra, hiletetan ere izan du eragina. "Gertatu izan da hil den herritarraren senitarteko asko etxean konfinatuta egotea hileta orduan. Hemendik aurrera familiak eskatzen badu egingo da hileta, baina bestela, aurrerago ospatuko dira, egoera hobea denean. Abesbatzako kide batzuengana ere iritsi da birusa eta erabaki dute datozen astetan, behintzat, ez abestea, ikusita gainera datuak goraka doazela. Beraz, datozen astetan, organistak bakarrik joko du egingo diren hiletetan", azaldu du parrokoak, Horazio Argaratek.
200 lagun pasako edukiera orain
Bestalde, edukiera %35ekoa da orain parrokian, hartutako azken neurri murriztaileen arabera. "Horrek esan gura du 200 lagun pasatxo sartzen direla orain parrokian, batera. Ohiko elizkizunetan ez, baina arazoa bizpahiru urteurren edo gehiago elkartzen badira sor daiteke", gaineratu du Argaratek.
Elizkizunei dagokionez, mantendu egiten da horien ordutegia: 19:00etan astelehenetik zapatura eta eguerdian domeketan.