Olakua auzoko irisgarritasun planaren beste fase bat egiten hasita daude dagoeneko. Auzoaren hasierako gunean egingo dituzte oraingoan, eta asmoa da 2021eko urtarrilean amaitzea.
Eraberritzeko proiektua
Olakuako 2 eta 3. zenbakidun etxe-blokeen inguruko urbani-zazioa berritzea da lan horien helburua, A2B Arquitectos en-presak idatzi zuen proiektuaren arabera. Hilaren hasieran ekarri zuten materiala eta langileek erabiltzen dituzten aldagelak dauden kasetak, eta urriaren erdian, 15ean, hasi zituzten lanak.
Eremu horretan dauden atarien ondoko oinezkoen ibilbideak egokituko dituzte, irisgarri bihur-tuko, zebra-bideak egin eta mugikortasun urria duten pertsonentzako aparkalekuak berrituko dituzte, irisgarritasun arauetara egokitzeko edo, araua guztiz bete ezin denean, gaur egungo egoera nabarmen hobetzeko. Hau da, Txiki Txoko haur-eskolaren eta auzoko autobus geralekuaren artean ibilbide irisgarria egokitzeko, Olakua auzoko 2A-2B eta 3A-3B etxe arteko eremua eraberritzea aurreikusten duen proiektua ari dira orain gauzatzen. Espaloiak zabalduko dira, batez ere, 3-A eta 3-B atarien aldean. Mantendu egingo dituzte han dauden aparkalekuak, berritu egingo dituzte alde bateko zein besteko eserlekuak, eta zintarria ipiniko dute berdegunearen bueltan, ikusmen urria dutenen orientazioa errazteko. Gainera, 2-A eta 2-B etxeen aldameneko ibilbideak ere berrituko dituzte, zoladura berria jarriz eta bidea oztopatzen duten bide-seinaleak eta farolak tokiz aldatuz. Altxatutako plataforma erako bi zebra-bide berri egingo dituzte, Txiki Txokora eta autobus geltokira doazen oinezkoen bideekiko lotura modu seguru eta irisgarrian bermatzeko.
Ur saneamendua ere bai
Dagoeneko hasi dira eremu horretako espaloi batzuk zulatzen. Zulo sakonak egin dituzte; izan ere, irisgarritasun lanekin batera ur saneamendua berritzeko ere aprobetxatuko dituzte obrak. Gipuzkoako Urak SA enpresak eskatu du lan horiek egitea, eta lanok euri urak eta ur zikinen saneamendua berritzea aurreikusten dute. Ugarte eraikuntza enpresari esleitu dizkio Udalak, 139.909,92 eurotan –BEZa kanpo–. Orain egiten ari diren obra horiek lehen auzoko janari dendaren inguruan egindakoaren jarraipena dira eta ez dira azkenak izango. Oraindik fase gehiago gelditzen dira egiteko.