Egungo egoera kontutan hartuta eta bisitetan sei lagun baino gehiago ezin direla elkartu errespetatuta, Udaleko Berdintasun sailak, Oñatiko Emakumeen Kontseiluak eta Gipuzkoako Protokoloen Artxibo Historikoak erabaki dute bertan behera uztea aste honetarako artxibora antolatuta zituzten bisitak. Bertan behera gelditu dira, baina horrek ez du esan gura egingo ez dituztenik, Berdintasun sailak jakinarazi duen moduan: "Asmoa bada egitea baina beste momentu batean egingo ditugu, orain ez da une aproposena".
Dokumentalak, bihar
Bisitekin batera, Selma Huxley Barakham zein zen, zer lan egin zuen, nola, ikerketak zer dakarren... jasotzen duten bi dokumental ere antolatu dituzte ikerlaria omentzeko prestatutako jardunaldien barruan. Eta horiek eskainiko dituzte. Dokumentalak dira: TVEk ekoitzitako Mercaderes y balleneros, una historia de ultramar eta ETBko Selma Huxley, el reto de una leyenda.
Bihar, urriak 28, izango da dokumentalen emanaldia, 19:00etan, zinema aretoan. Doan da emanaldia baina aretoko edukiera mugatua da eta sarrerak aurretik hartu behar dira udal webgunean edo Txokolateixan.
