Emakumezkoen gorengo talderako eta Lehenengo Erregional Mailako taldeetarako delegatu edo laguntzaileen beharra dutela azaldu dute Aloña Mendiko futbol sailetik. Nerea Uriarte eta Garikoitz Nuñez dira, hurrenez hurren, talde horien entrenatzaileak. Uriartek azaldu duenez, pertsona bakarrarentzat lan handia da entrenamenduak prestatu eta kudeatzea, eta, hori gutxi balitz, neurketak astebururo jokatzen dituzte: "Entrenatzaileok afizio dugu futbola, eta eskertzekoa litzateke laguntza". Koronabirusaren eraginez hartu beharreko neurriek "are gehiago" zailtzen dituzte entrenamenduak: "Lehen, jokalariek laguntzen zidaten materialarekin, baina orain, nik bakarrik ukitu dezaket hori".
Nuñezek adierazi du futbolzalea den norbait beharko lukeela ondoan, baina ez hori bakarrik: "Konpromisoa hartzeko prest dagoen norbaiten beharra dugu; eta, jakina, futbol arloan ekarpena egin dezakeena". Horren harira, Nerea Uriartek azaldu du laguntzera animatzen denak entrenatzaileen "pareko" lana egingo lukeela: "Ez litzateke entrenatzailearen aginduetara egongo, alegia".
Deialdia bi talde horietarako baino gehiago, "orokorra" dela zehaztu du Uriartek, "jende falta orokorrean Aloña Mendiko sail ezberdinetan dagoen arazo amankomuna delako". Bere ustez, klub batek "biziraun" dezan funtsezkoa da laguntza.
Futbol eskola, geldi
Futbol eskola guztiz geldi dagoela azaldu du, bestalde, Auritz Larrea entrenatzaileak. Halere, "laster" hasi ahal izateko bilerak egiten ari direla argitu du.
