Auto-ilara berandu eta sakabanatuta iritsi da Arantzazura, baina koloretako puxikekin eta leihoetara eta ateetara itsatsitako askotariko mezuekin. Ez datoz bat pandemiarekin lotuta hedabideetatik eta erakundeetatik helarazten duten mezuarekin. "Ez dira egia esaten ari", azaldu du Joseba Argintxonak.
Giza-katea egin dute aparkalekutik basilikaraino, eta azaldu dute beldurra eragiten duen bertsio bakarra beharrean eztabaida zientifiko serioa exijitu behar dela. "Arantzazun hainbat gauza sortu dira. Gaur ere hemen hainbat talde elkartu gara eta izan dadila zerbaiten sorrera", gaineratu dute.
Lanean jarraituko dutela ziurtatu dute eta azaldu dute harremanetan daudela urriaren 3rako sendagileek egitekoa duten mobilizazioko bultzatzaileetako batzuekin. Medikuek bat egiten badute Osasuna eta Eskubideak taldeak egiten dituen aldarrikapenekin Osasuna eta Eskubideak taldeak ere bat egingo du mobilizazio horrekin.
