Sanchez asturiarra tropelaren aurretik joan da, amaieratik 30 bat kilometrora, eta bakarrik helmugaratu da, 21 txirrindulariko talde bati minutu erdiko aldea aterata. Talde horretan Xabier Isasa - Goierri Kirol Elkartea- nagusitu da, Lehendakari Txapelketako irabazle nagusi izan den Unai Iribar - Laboral Kutxa – Euskadi Fundazioa - gaindituz.
Antolakuntzatik, balorazio positiboa
Aloña Mendiko ziklismo saileko Ruper Arkauzek adierazi duenez, txapelketa inongo arazorik gabe antolatu ahal izan dute: "Joan den asteburuan egin bezala, segurtasun neurri guztiak bermatuz egin dugu gaurkoan ere Mikel Deuna Sariaren 33. aldia. Helmugaratzeko unean herritar ugari gerturatu dira lasterketa ikustera baina prestatutako espazioak haien arteko segurtasun neurriak mantentzea ahalbidetu du".
