Meza nagusia baino ez da egingo bihar, irailak 9, Arantzazun. Frantziskotarrek Ama Birjinaren eguna aurreko urteetan bezala ez ospatzea erabaki dute,COVID-19a dela-eta, kutsatzeko arriskua murriztu nahi dute. Horrenbestez, agintari zibilei ez zaie ohiko harrerarik zein aurreskurik eskainiko. Oñatiko bandak eman ohi duen kontzertua eta oñatiarren oinezko erromesaldia ere bertan behera gelditu dira.
Meza nagusia 12:00etan hasiko da. Plazak mugatuak izango dira eta aurrez hartu beharko dira txartelak. Txokolateixan, Arantzazuko dendan eta meza hasi baino ordubete lehenago, 11:00etan, jarriko dituzte salgai basilika kanpoan. Txokolateixan, esaterako, dei asko ari dira jasotzen Oñati kanpotik ere sarreren inguruan galdetuz; oraindik gelditzen dira.
Oñati-Arantzazu autobus zerbitzua
Oñati eta Arantzazu arteko autobus zerbitzua egongo da bihar. Goizekoa ordu erdirokoa izango da, 14:30ak arte. Hortik aurrera, ohikoa den orduroko maiztasunez eskainiko dute.