Mendia eta kultura uztartu gura dituen Urmuga ekimena ari dira aurrera eramaten egunotan, eta euskal naziotasuna oinez eta kantuz aldarrikatzea da helburua. Mendi ibilaldien bitartez Euskal Herria osoa zeharkatu gura dute. Hain zuzen, uztailaren 14an abiatu zuten zeharkaldia, Angulo Bortun (Salvada mendilerroa, Araba) eta, dena ondo bidean, abuztuaren 1ean borobilduko dute, Hiru Erregeen Mahaiaren gailurrean. Felipe Uriarte mendi-gidariak eta lantaldeak gidatuta, hemeretzi mendi ibilaldi egingo dituzte, guztira, eta Aizkorrin egingo dute geldialdia gaur.
Kontzertua, Urbian
07:00etan abiatuko da mendizale taldea Urbiatik; izan ere, bertako fondan pasako dute gaua. Migel Zeberio proiektuaren sustatzaileak azaldu duenez, Aizkorrira iristea izango da helburua; eta San Adriandik jaitsiko dira gero mendizaleak, Urbiara itzultzeko. "Hori da asmoa, baina eguraldiak ere eragingo du ordutegian", gaineratu du. Horren ostean, 18:00etan izango da musika emanaldia, Maddi Oihenart, Juantxo Zeberio eta Gorka Benitezen eskutik.
Sustatzaileak aitortu du orain artean "zoragarri" eta "jendarte politean" aritu direla mendiz mendi, eta oraingoan ere hala aritzea espero dutela: "Lehen mendian, Tologorrin, 100 bat pertsona izan ginen emanaldia ikusten".
