Duela dozena erdi urte, gutxi gorabehera, denboraldiko azken entrenamendua egitera joan ziren Aloña Mendiko txirrindulari gazteenak, kategoria txikienekoak, eta bapatean, txirrindulari nagusiak batu zitzaizkien: "Izugarria izan zen hori. Aho zabalik gelditu ziren txikienak. Gero, elkarrekin meriendatu zuten guztiek eta giro oso-oso polita sortu zen. Harrez gero, horrelakoak izan dira denboraldi bakoitzaren azken entrenamenduak. Zuzendaritzako kideak eta gurasoak ere parte hartzen dute, gainera. Oso giro polita egoten da", dio Aloña Mendi txirrindularitza saileko Ruper Arkauzek.
Eta ohiturari jarraituz, atzo, egubakoitza, egin zuten aurtengo denboraldiko azken entrenamendua. Olatera joan zen tropela.
Denboraldi pobrea
Aurtengo denboraldia bere horretan gelditu da txirrindulariendako, ez bait dute lasterketarik izan. "Martxoaren 14an genuen lehena, Oñatin, eta bertan behera gelditu zen koronabirusagatik. Ez dugu lasterketarik izan denboraldi osoan", azaldu du Arkauzek.