Martxoaren 16an egin zuen azken emanaldia Ainhoa Larrañagak eta Oñatira etorteko deseatzen zegoen, "berriz jotzen hasteko". Ez da bakarrik etorri gainera, ondoan izan ditu: Iker Lauroba (baxua eta kontrabaxua), Garazi Esnaola (pianoa), Haritz Lauroba (bateria) eta Amaia Miranda (gitarra).
Jazz ukituko abesti asko jo ditu taldeak. Boskote formatuan asko eta formato intimoagoan beste batzuk. Kanta bana abestu du Larrañagak, adibidez, taldeko beste bi neskekin.
Kanta propioak eta bertsioak
Abeslariak berak esana da bere musika inspirazioak jazz, soul eta swing estiloetatik datorrela bereziki baina ez dakiela ziur disko hau non kokatu: "Intimoa eta nahiko independentea iruditzen zait, oso pertsonala ere bai; abestiak erraietatik atera dira; malkotan idatzitakoak dira asko. Egunerokotasuneko gaiei eta harremanei buruzkoak".
Oñatin abestu duen kantuetako bat da, adibidez, Pairamenak izenekoa, “injustiziei buruzkoa”, Larrañagak esan duen moduan. Bere kantuez gain Chris Isaaken eta Mikel Urdangarinen bertsio bana ere jo ditu boskoteak.
Publiko gaztea
Ordubete eskas iraun du emanaldiak eta segidan jo dituzte kantuak, batetik bestera azalpen luzeak eman barik. Bertaratu den jendeari eskerrak emateko, baina, hartu du hitza hernaniarrak.
ETBko Goazen! saioan aktore ibilitakoa ere bada Larrañaga eta han ezagututa, gaztetxo asko egon dira kontzertuan. Emanaldiaren amaieran denak batera altxatu dira, Goazen!-eko emanaldietan gertatu izan den moduan, baina ez dira garai berak, ezin jende pillaketarik egon orain.
