Zubikoa kiroldegian fitness zerbitzua martxan jarriko dute uztailean, eta eskaintza zabala antolatu dute hilabete osorako. Dagoeneko eman daiteke izena kiroldegian bertan; ekainaren 25a izango da azken eguna.
Fit bikea, pilatesa, body tonoa, nordic walking delakoa, zumba eta entreno funtzionala eskainiko dituzte. Rosa Lasagabaster Kirol teknikariak adierazi duenez, eskaintza iazkoaren antzekoa izango da, baina kirol ordu gehiago eskainiko dituzte aurten, "taldeak murritzagoak izango direlako". Ekintza gehienak kantxan egingo dituzte –fit bikea izan ezik–. Era horretan, "eremu zabalagoa" hartu ahal izango dute kirola egiteko, eta, beraz, pertsonen arteko bi metroko segurtasun distantzia mantentzea "errazagoa" izango da.
Horretaz gain, teknikariak azaldu du posible den heinean nork bere materiala etxetik eramateko eskatuko dutela, eta Zubikoako instalazio zein materialean garbitasuna "bereziki" zainduko dutela.
