Arratsaldean, 18:00ak inguruan, izan da gertaera. Auto batek bizikletan zihoan 18 urteko neska bat harrapatu eta ihes egin du. Gertatutakoaren lekukoek udaltzaingora deitu dute eta ikusitakoaren berri eman. Kale batzuk beherago harrapatu dute auto gidaria. Udaltzainek alkoholemia froga egin diote euren etilimetroarekin. "Positibo eman duela ikusita, Ertzaintzara deitu dugu eta etilimetro ofiziala eskatu, epaitegirako balio duen froga egiteko", udaltzainburuak azaldu duen moduan. Bigarren proba horretan lehen positiboa baieztatu da: 0,70 eman du. Delitua leporatu diote udaltzainek eta atestatu lanak egin ostean aske utzi dute, epaitegiko abisuaren zain. Neskak kolpea jaso du eta min zuen hainbat tokitan eta Debagoieneko Ospitalera eraman dute azterketa egitera.