Oñatiko emakume ekintzaileak du izena Pili Kaltzada kazetariak gidatuko duen gaurko solasaldiak eta hantxe izango dira, adibidez, Miren Elgarresta, Gipuzkoako Foru Aldundiko berdintasun zuzendaria; Nerea Ibañez, ASPEGI elkarteko, Gipuzkoako emakume ekintzaileen elkarteko, presidentea eta hiru belaunalditako Oñatiko emakume ekintzaile batzuk.
Mahai-ingurua bereziki emakume profesionalei eta merkatariei begirakoa da baina Oñatiko emakumeei guztiei dago irekita, baita gizonei ere. Gai bat baino gehiago izango dute hizpide solasaldi horretan. Adibidez, emakume autonomoak eta kontziliazioa izango da gaietako bat. Antolatutako mahai-inguruari buruz, EAJk dio bidalitako prentsa oharrean, emakumeen eta gizonen arteko berdintasuna esparru ezberdinetan ari direla lantzen eta horren barruan batzokian egindako hausnarketa prozesu batetik irtendako pro-posamena dela solasaldi hau. Mahai-ingurua ez dela ekintza isolatu bezala planteatzen ere gehitu dute jeltzaleek, azalduz euren helburua dela herri mailan emakumeen arteko sinergiak eta harremanak sortzea, "benetako berdintasunerako pausoak elkarrekin emateko eta esperientziaz aberasteko".
