Iker Martinez eta Zaldi Herrenak taldeak matinee kontzertua eskainiko du domeka honetan, Antixeneko gaztetxean. 12:30ean izango da hitzordua, eta sarrerak egunean bertan eskuratu ahal izango dira, bost euroren truke.
Irail amaieran aurkeztu zuen Martinezek Lurralde berriak izeneko diskoa, eta ordutik, herririk herri ari da Zaldi Herrenakekin batera. Azken boladan "formatu txikiko" kontzertuak eskaintzen jardun dutela azaldu du abeslariak berak, eta domeka honetako kontzertua "nahiko akustikoa" izango dela aurreratu du. Horretaz gain, kantu ezberdinez gozatzeko aukera izango da gaztetxean: "Disko berriko abestiak ez ezik, zaharragoak ere joko ditugu; baita bertsioak ere", azaldu du. Herrian jotzeari buruz galdetuta, "berezia" dela dio, senideak eta lagunak ikus-entzuleen artean direlako.
Egunotan, guztira, hiru kontzertu eskainiko dituzte: lehena atzo, Gasteizen; hurrena gaur bertan, Bilboko Bira Kulturgunean, 20:00etan; eta azkena domekako matinee-a izango da.