Partidu intentsua eta parekatua jokatu zuten atzo, zapatua, Fagor Industrial Aloña Mendik eta Txiki Polit Zarautzek, Oñatin. Markagailua oso parekatua egon zen lehia guztian. Berdinketak izan ziren nagusi minutu gehienetan. Bada, bi taldeek ere eduki zituzten hiru goleko errentak.
Parekotasun hori bigarren zatiaren 25. minutuan apurtu zen. Aloñako entrenatzaile Aitor Garciak txartel gorria ikusi zuen, protestatzeagatik. Ordurako, Jon Irizar jokalaria ere kalean zegoen, bi minutuko zigorrarekin. Entrenatzailearen zigorra, kantxa zegoen jokalari batek bete behar zuen. Hori horrela, oñatiarrak bost jokalarirekin geratu ziren: atezaina eta beste lau. Hori baliatu zuten zarauztarrek markagailuan aurretik ipintzeko.
Egoerari buelta emanda, oñatiarrak gai izan ziren lehia berdintzeko, bukaerarako hamar segundo geratzen zirenean: 18-18. Baina, azken gola, Zarautzen sartu zuen. "Garaipena eskutan eduki dugu. Irabazteko aukerak izan ditugu, baina galtzeko ere bai. Une erabakigarrietan ez dugu asmatu", esan zuen lehiaren bukaeran Fagor Industrialen entrenatzaile Aitor Garciak.
