Partaidetzako aurrekontuetan herriko paseo tokietan komun publikoak jartzeko eskaera jaso zuen Oñatiko Udalak herritarrengandik, eta horietako bat erabilgarri dago dagoeneko. Munazategin jarri dute. Bigarrena jartzeko egokitzapen lanak egiten ere hasi dira.
Berez garbitzen diren komunak
Munazategin, bidegorriaren ondoan, jarri dute dagoeneko erabilgarri dagoena. Komun Lorke Systens SL enpresak instalatu du, 37.700 eurotan; obra zibila eta azpiegitura lanak udal brigadak egin ditu. Komunaren ondoan iturri bat ere jarriko dute. Partaidetzako aurrekontu horietan, Torreauzo-Madalena eta Olabarrieta-Asentzio ibilbideetan jartzea komunak eskatu zuten herritarrek. Horrela, bigarrena Olabarrietan jarriko dute, justu Aiastui baserri aldera, errepide azpiko pasabidearen ondoan. Udal brigadako langileak ari dira tokia egokitzen. Hau ere berez garbitzen den komuna izango da eta argindarra eta ur-hornidura bertaraino eramango dute.
