Gaur hasi eta domekara bitartean egingo dute Madrilen turismoko FITUR azoka eta han izango dira Oñatiko ordezkariak aurten ere. Oñatik turismo aldetik dituen aukerak eta eskaintzak erakutsiko dituzte hango postu batean eta era berean azokan parte hartzen duten beste turismo eragile edo agentziekin bilerak egingo dituzte bata bestearen eskaintzak eta eskaerak konpartitzeko. "Bilera horiek lotuta izaten ditugu eta azokan bertan egingo ditugu agentzia batekin baino gehiagorekin", dio Turismo Bulegoko Edurne Urteagak. Herrialde askotako ordezkariak daude FITURen eta haien lan egiteko moduak edo ideiak ere ikusiko dituzte Oñatiko ordezkariek, Oñatira egokitzeko gero.
