Bihar egingo dute agerraldia udaletxeko osoko bilkuren aretoan, urte osorako prestatutakoa aurkezteko, eta bertatik dantzan irtenda ekingo diote ospakizunari.
Urteurreneko egitarauaren antolakuntzan diharduen Jon Irizarrek azaldu duenez, soka dantza egingo dute, Aita Madina txistulariekin lagunduta: "Hamarkada bakoitzeko hamar pertsonak egingo dugu; 50ek, guztira". Horien artean izango dira dantzariak eta dantzari ohiak; izan ere, Oñatz osatzen dutenekin eta osatu zutenekin ospatu gura dute urteurrena.
Hilaren 22an, mahai-ingurua
Ekitaldiekin jarraitzeko, urtarrilaren 22an mahai-ingurua egingo dute. "Oñatzek historian izandako eboluzioari buruz jardungo dugu berbetan", azaldu du, eta dio saio "dinamikoa" izango dela, non anekdotek eta bizipenek ere lekua izango duten.