Aloña Mendiko mendi sailak prest dauka dagoeneko 2020rako mendi eta eski irteeren egutegia. Domekan, urtarrilaren 19an, egingo dute urteko lehen mendi irteera. Horrekin batera, azaroan mendi hamabostaldia eta argazki lehiaketa izango dira, datak aurrerago zehaztuko dituzten arren. Urtean zehar mendi sailak GPS nabigatzaileari buruzko ikastaroa antolatzea ere aurreikusi du.
930 lagun federatuta
Mikel Otero Aloña Mendiko mendi saileko kideak 2020rako federatutako herritarren berri eman du: "Guztira, 930 herritarrek eman dute izena sailean. Mendi irteeren kasuan, gainera, geroz eta herritar gehiagok hartzen dute parte ibilaldietan". Azken horren harira, herritarrei proposamen bat egin die Oterok: "Sailean geroz eta arduradun gutxiago gaude eta herritarren batek taldera gehitzeko interesa izango balu, jar dadila gurekin harremanetan".
Eski irteera gidatu bikoitza
Mendi sailak gidatutako bi eski irteera antolatu ditu 2020ko negurako: lehena otsailaren 1ean eta 2an eta bigarrena martxoaren 20an eta 21ean. Panticosa eta Batximaña inguruetan arituko dira lehen eski irteera eta izena emateko azken eguna urtarrilaren 24a izango da. Bigarrenean, berriz, Benasquen eta Remuñe bailaran arituko dira. Horrez gain, informazio gehiagorako, mendi sailak eskuragarri jarri du alonamendi.mendi@gmail.com helbidea.
400 euroko dirulaguntza
Aurtengo nobedadea ere izan du hizpide Oterok: "Herriko eragile edo norbanako orok mendi ekintza sustatzeko proiektua aurkezteko aukera izango du, mendi hamabostaldian aurkeztuko dena eta 400 euroko dirulaguntza izango duena".
