Gipuzkoako Parketxe Sareak antolatu du bisita, urteko sasoi hau urubi hontzak ezagutzeko "egokia" dela iritzita. Hontz mota hau gainontzekoengandik nola bereizi jakiteko eta zein berezitasun dituen ikasteko aukera izango da iluntzean, eta bi ordu inguru iraungo du bisitak –hasieran azalpen batzuk emango dira eta–. Adin guztientzako herritarrei zuzendutako ekintza izango da, eta pertsonako bost euro ordaindu beharko dira. Arantzazuko Parketxeko ordezkariek azaldu dutenez, erreserba egitea beharrezkoa da, 943 78 28 94 edo 699 33 51 83 telefonotara deituta, plaza mugatuak daude eta. Bisitara linterna eramatea ere gomendagarria dela argitu dute.