Burua partiduan jarrita eman zioten hasiera norgehiagokari eta abantaila polita atera zion etxeko taldeak Eskolapiosi. Ondoren, baina, gora etorri ziren aurkariak, eta kontraerasoan hainbat gol egin zizkieten. Mikel Agirre kapitainak ere onartu zuen bukaeran, gol batzuk oparitu izana. Atsedenaldian, 14 eta 11 zen markagailuan.
Bigarren zatian errepikatu egin zen aurretik bizi izandakoa. Gogotsu kantxaratu ziren Fagor Industrial Aloña Mendiko jokalariak baina aldea handitu zutela ikusitakoan erlaxatzen hasi ziren. Zortzi minututan, gainera, jokalari bat gutxiagorekin jokatu behar izan zuten. Hala ere, gutxienez bi goleko abantailari eutsi zioten uneoro, eta bukaerako emaitza 31 eta 26 izan zen.