Gizon-abesbatza, Santa Anako agertokira etzi

Maialen Regueiro 2019ko aza. 15a, 15:50

Esteban Urzelai oñatiarrak zuzentzen duen Suhar abesbatzak emanaldia eskainiko du domekan, Musikegunak egitasmoaren baitan. kontzertua Santa Ana antzokian izango da, 19:00etan, eta sarrerak salgai daude sei euro eta erdian, txarteldegi digitalean.

Musikegunak jardunaldien baitan, Esteban Urzelai zuzendari oñatiarraren Suhar abesbatzak ekimenaren hirugarren emanaldia eskainiko du domekan, 19:00etan, Santa Ana antzokian.

Gizon-abesbatza

Urzelai urtetan aritu izan da Ganbara Abesbatzan, baina hura utzi eta proiektu pertsonala sortzeko gogoa piztu zitzaion: "Euskal Herriak baditu gizon-abesbatza asko, nahiz eta azken urteetan gutxitu egin diren. Hutsune hori betetzeko asmoz sortu genuen Suhar, eta 24 abeslarik osatzen dugu taldea". Urzelaik azaldu duenez, gainera, Suhar abesbatzak maiatzean eman zuen lehen kontzertua, Donostian. Horren ondoren, Azkoitiko Musikaldian izan ziren eta hirugarren hitzordua domekakoa izango da.

Ganbarako kideak

Suhar abesbatzan diharduten 24 abeslaritatik bi Urzelairekin Ganbaran aritutakoak dira: Gorka Aranburu eta Aitor Biain oñatiarrak, hain zuzen. "Abesbatza osatzerakoan, lagunengana eta musika aldetik maila altua duten horiengana jo nuen. Azken batean, lagun kuadrilla bat osatu dugu". Horrez gain, gaur egun Ganbarako kide den Aitor Garitano bergararrak ere Suharren dihardu.

"Programa ederra" domekarako

Amaia Zipitria piano-jotzailearekin, Maite Arruabarrena, mezzosopranoarekin eta Juan Ignacio Emme biolontxelo-jotzailearekin "programa ederra" osatu du Suhar abesbatzak, non maitasuna, gaua eta natura izango diren protagonista.

Sarrerak salgai

Domekako kontzerturako sarrerak salgai daude, sei euro eta erdian, www.oñati.eus atarian eta txarteldegi digitalean.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak