Oñatiko Udalak eta Gipuzkoako Foru Aldundiak elkarlanean antolatutako Musikegunak egitasmoaren 41. edizioa asteburu honetan hasiko da. Guztira, lau emanaldi izango dira eta, beste urte batzuetan bezala, guztiak Santa Ana Antzokian izango dira eta 19:00etan emango zaie hasiera. Lehen emanaldia domekan izango da, azaroaren 3an, Capi-lla Gregorianista Donosti Ereski koruaren eskutik. Gauzak horrela, 41. edizio honetan, bi abesbatzak eta beste bi musika taldek hartuko dute parte, txandakatuz.
Koru bikoitza
Capilla Gregorianista Donosti Ereski koruak, gaur egun Jokin Otamendik zuzentzen duenak, berrogei urte baino gehiago daramatza musika gregorianoa eskaintzen. Horrez gain, azaroaren 17ko emanaldia ere abesbatza batek eskainiko du: Suhar gizonkoruak, hain zuzen. Kasu honetan, 26 abeslarik osatzen duten abesbatza hau 2018an sortu zen eta, Esteban Urzelai oñatiarrak zuzenduta, alemaniar eta austriar musikagile erromantikoen musika eskaintzen dute.
Musika taldeak
Bi abesbatzez gain, beste bi musika taldek hartuko dute parte edizio honetan. Musbika Ensemble izango da lehen taldea, azaroaren 10ean emanaldia eskainiko duena eta XVIII. mendeko euskal eta europar musikagileen musika lantzen duena. Aurtengo azken emanaldia, berriz, Entrequatre taldearen eskutik izango da, azaroaren 24an. Talde hau lau gitarristak osatzen dute eta Espainiako eta Latinoamerikako musikagile handien lanak interpretatzen dituzte.
Emanaldien egitaraua
Kontzertua guztiak Santa Ana Antzokian izango dira, domekan, 19:00etatik aurrera.
- Azaroak 3: Capilla Gregorianista Donosti Ereski. Zuzendaria: Jokin Otamendi.
- Azaroak 10: Musbika Ensemble.
- Azaroak 17: Suhar, Gizon-korua. Zuzendaria: Esteban Urcelay.
- Azaroak 24: Entrequatre laukotea.
Sarreren salmenta
Emanaldietarako sarrerak aurrez erosteko aukera dago, sei eurotan, gazteleku ondoko leihatila digitalean edota www.oñati.eus atarian.
